Биыл еліміздің астанасы – Нұр-Сұлтан атауымен екінші жыл 22 жасын қарсы алды. Сәулетті, сұлу елордамыз тағы бір жылды артқа тастап, жаңа тарихтың сүбелі жолына нық қадамын басты. Міне, тәуелсіз еліміздің саяси, мәдени әрі экономикалық алаңына айналған, қанатын құлаш сермеген, өркениеті кеңге жайылған, асқақ айбынды, тарихы таңбалы шаһарымыз жарқын болашақтың көрінісіне күн санап айналғандай.
Ағымдағы жыл еліміз бен онда өмір сүріп жатқан халқымыз үшін оңтайлы болды деп айта алмаймыз. Бүкіл әлем елдерін тік тұрғызған COVID-19 дерті бізді де айналып өтпей өз қиыншылықтарын әкелді. Ел экономикасы әлсіреп, халықтың тұрмысына да едәуір нұқсан келгені жасырын емес. Осыған орай, барлық тиісті шараларды ескере отырып астана күні онлайн форматта өткен болатын.
Аз ғана өткеннен сыр шертсек. 1997 жылы егеменді еліміздің көшбасшысы Н.Назарбаевтың Жарлығымен Елорданы Алматыдан Ақмолаға көшіру туралы шешім қабылданып, 1998 жылдың мамыр айында жаңа атау «Астанаға» өзгертілді. Осы жылдың шілдесінде Астананың халықаралық тұсауы кесіліп, ЮНЕСКО-ның шешімімен «Бейбітшілік қаласы» жоғары атағы беріліп, мәртебесі асқақтай түсті.
«1998 жылдан бастап Астана күні 10 маусымда аталып келді. 2008 жылдың 18 шілдесінде ҚР Мәжілісінің әлеуметтік-мәдени даму комитетімен енгізілген «Қазақстан Республикасындағы мерекелер туралы» Заңына өзгерістер енгізу туралы» заң жобасын мақұлдады. Осы құжатқа сәйкес Астана күні – 6 шілде болып белгіленді. Бұл күні елорданы Астанаға көшіру туралы шешімнің мерейтойы ғана емес, сонымен бірге Қазақстанның Тұңғыш Президенті Нұрсұлтан Назарбаевтың туған күні де атап өтілетінін атап өткен жөн».
Астана жаңа мәртебе алғаннан кейін жаппай құрылыс жұмыстары басталды, нәтижесінде Қазақстан астанасы Орталық Азиядағы ең әдемі заманауи қалалардың біріне айналды. Қала құрылысына тек қазақстандық сәулетшілер ғана емес, сонымен бірге белгілі шетелдік сарапшылар да қатысты. Соның ішінде Кисе Курокава және Норман Фостер сияқты әлемдік атақты адамдар бар. Сонымен бірге, Нұрсұлтан Назарбаевтың астана еуразиялық мегаполиске айналуы керек, оның тұрғындары мен қонақтары үшін ыңғайлы және жайлы жағдай жасалуы керек деген негізгі идеясы іске асырылды.
Елорданың құрылысы қазір де жалғасуда және жыл сайын қалада жаңа субұрқақтар, алаңдар мен саябақтар пайда болады. Жалпы алғанда, аз уақыт ішінде, тарихи стандарттар бойынша, бір кездері облыстық провинция орталығы еліміздің нақты астанасына айналды. Енді қала – қарқынды дамып келе жатқан мегаполис, Қазақстанның әкімшілік, әлеуметтік-экономикалық және саяси орталығы, елдің өсіп келе жатқан қуаты мен оны одан әрі дамытудың жоғары әлеуетін көрсетеді.
Ұлт көшбасшысы Нұрсұлтан Назарбаев өзінің «Еуразия жүрегінде» кітабында жазғандай: «Астана – Қазақстанның жаңаруының нышаны, оның көпұлтты халқының сарқылмайтын жасампаздық қуатының негізі, қиын кезеңдерде жаңа астананы салуға кіріскен халықтың сенімі. Бұл өз бостандықтарына қол жеткізген ұлттың өзінің гүлденген болашағына, ұрпақтарының болашағына деген үміт пен сенім символы».
Сондай-ақ, елорда халқы бірнеше есе артқанын айтпай кеткен де болмас. 1996 жылы қала тұрғындарының саны 270 мыңнан аз ғана асса, 2020 жылдың мамыр айына елорда халқы 1 149 947 адамды құрады, бұл Алматыдан кейінгі Қазақстандағы екінші көрсеткіш.
Елорда күні бүкіл Қазақстан бойынша аталып өтіледі және шын мәнінде ұлттық мереке. Осы жылдар ішінде бүкіл ел көлемінде концерттер, көрмелер, фестивальдер болып өтетін. Алайда, биыл бүкіл әлемді дүр сілкіндірген коронавирустық пандемияға байланысты түзетулер енгізілді.
Соңғы екі айда эпидемиологиялық ахуал тек астанада ғана емес, бүкіл республикада айтарлықтай нашарлады. Нәтижесінде, Нұр-Сұлтан әкімдігі қала күніне арналған барлық жоспарланған мерекелік шаралардың күшін жойып, оларды тек онлайн режимінде өткізуге шешім қабылдады.
Нұр-Сұлтан арман қала. Ал, арман мен болашақ тоғысқан жас шаһардың әрбір күні тарих десек қателік емес. Жемісті де жеңісті жылдарды бастан кешіріп жатқан Нұр-Сұлтан – ынталы, білімді жастардың ортасына айналды. Бүгінде онда дархан даланың түкпір-түкпірінен ағыла барып, болашағын ұштастыратын жандар қаншама. Онда жастар сүйікті жұмысын тауып, отбасын құрып, жас қаланың бір кірпіші болып қалануда.
Ендеше, келісті келбеті көз сүріндірер қаланың кұшағы кеңге жайылып, әлем халқы сүйсіне қарайтын, туристер ағыла келетін шаһар болуын шын ниетімізбен тілей отыра, еліміздің мақтаны бас қаламыздың алда жетер жетістігі мен басынан өткерер таңбалы тарихы көбейе берсін демекпіз.
Ақберен АМАНГЕЛДІ,
Түркістан.